طريقة عمل صوابع زينب
طريقة عمل صوابع زينب بمكونات سهلة وبسيطة ومش مكلفة خالص أول حاجة هنحضر المكونات ومينفعش نقص أى مكون منها خالص عشان تكون الحلويات زى بتاعت البياع بالظبط.
- المكونات
- نص كيلو دقيق سميد اللى هو دقيق بسبوسة ويكون النوع الناعم
- نص كوباية دقيق حلويات هو اسمه كده دقيق زيرو حلويات هو مخصوص للحلويات
- معلقتين كبار زيت
- معلقتين كبار سكر
- معلقة خميرة
- ربع كوباية مياه
- طريقة التحضير
أول حاجة نسخن معلقتين الزيت في طبق ع النار يسخنوا شوية وبعدين نشيلهما على طول من على النار
بعد كده نجيب نص كيلو السميد مع ربع كوباية المياه ونص كوباية الدقيق ونحطهما مع بعض ونعجنهم مع بعض وننزل بالزيت والسكر ونعجن كويس لحد أما تكون العجينة ماسكة في بعضها ولو أحتجتى مياه تانى مفيش مشكلة
بعد كده نجيب معلقة الخميرة ونحطها في مياه دافية في كوباية ورشة ملح ورشة سكر نسيبها تخمر
بعد ما الخميرة تخمر نعجنها في العجينة بتاعتنا ونتأكد إن الخميرة راحت لكل العجينة
بعد كده نقطع العجينة على شكل صوابع ونشكلها براحتنا أو نخليها صوابع زي بتاعت البياع
نروح بقا نحط المقلاية ع النار ولازم يكون الزيت كتير ده شرط أساسي لنجاح صوابع زينب
نقلي صوابع زينب يدوبك تكون لونها دهبي زي بتاعت البياع ونشيلها من الزيت
الشربات
نحط كوبيتين مياه مع نص ليمونة معصورة وكوبيتين ونص سكر على النار يغلوا ويتقلوا كويس ويبقا ده الشربات بتاعنا بعد ما نطفي من عليه نحط فيه معلقة فانيليا
ننزل بصوابع زينب في الشربات ونخليها تشربه كويس وبعد كده نحط في طبق التقديم وبالهنا والشفا
تعليقات
إرسال تعليق